العلاقات الرايحة راجعة

5 نوفمبر 2018 اكتب بنفسك


انا عندي كميه مشاعر متعبه وموجوعه من اللي كل يوم بسمعه من ناس قريبه ليا ف علاقاتهم ..

وحاسه بيهم لاني مريت فيه…

انا هكتب شويه عن “العلاقات الرايحه راجعه ”

الناس اللي بيتعاملو  بمنتهي الحب ..وفجأه يختفو ..وفجأة يرجعو ..وكل حياتهم فجأات .. انت مش عارف انت بتعمل ايه

انت كانك بتحط نار علي شويه تلج. وبعدها تروح واخد التلج اللي انتهي أمره دا وتقوله معلش هحطك حبه ف الفريزر عشان عايزك تلج تاني

وجع قلللللللب  اللي بيحصل دا اسمه وجع قللللب

 

انت عندك ف حياتك النوع دا من العلاقات ارجوك. احسم ..

اقعد فكر في الطرف التاني وحط مسمي لكل العلاقات اللي ف حياتك  ..معلش اقعد فلتر. .هما مين القريبين ومين اللي اصدقاء ومين اللي هما بس زيادة عدد علي الفيس بوك

 

العلاقات القريبه حطلها اسم لو المسمي عندك مختلف عن الشخص التاني ف الأغلب  لازم تعلن عن المسمي دا  وتوضحه ف وجوده مش ف مسج  خليك جرئ واقعدو واتكلمو وحسو بمشاعر  بعض وانتو بتتكلمو عن علاقاتكو .. واحطو اسم للعلاقه مع بعض.. هتكتشفو حاجات حلوة كتير

اسم العلاقه وتوضيحها وأسباب الاختلاف لو مختلفين وكل حاجه تكون ف حضور الطرف التاني  لأن ف الأغلب القعده دي  ياما  بتصلح وجة نظر   ..وكتير  علاقات رجعت تاني للنور بسبب قعدة صراحه ..وبالمناسبه دا اسمه نقاء مش انك مدلوق

ياما بتحسم وبتنهي باحترام من غير غمووووض  وعلي الرغم أنه مؤلم لكن هيبقي اهون من أنه طرف يعيش علي اسم علاقه وهميه

 

محدش يقرر يسمي العلاقه لوحده وكل واحد يتصرف بناء علي المسمي بتاعه وف الاخر تكتشف انك كنت بتتعامل حبيب مع صديقه. ولا صديق مع حد بيحبك

 

لان للاسف  محدش بيقدر يقاوم سحر و جاذبية انه يكون محبوب أو مطلوب ، حتي و لو من الشخص الغلط

 

لما  تقرر تحسم انك مش هتكمل علاقة مع اي حد ياريت توضحلو اسباب و وجهة نظرك  ، عشان مفيش أسوء من أن شخص يكمل حياته و هو حاسس انه مش كفاية ..

 

ومعلش لو بكلمك بصيغه المذكر بس لان للاسف انت الوحيد اللي معاك الصلاحيه تعمل كدا  ..في مجتمعنا الشرقي وتفكير الراجل الشرقي .. لان صعب بنت تروح تقول انا حطاك ف مسمي علاقه حب وانا بحبك

للاسف انتو مش بتحترمو دا ولو انت جينتل مان أو وقبلت صراحتها ف الأغلب مبتقبلش ترتبط بيها… (تلكيك اي عك وخلاص )

 

ف علي الاقل خفف الحمل شويه واعمل انت الخطوة دي  عشان انتو الاثنين ترتاحو ..

مع اني لو اتيحت لي الفرصه كنت عملت كدا ف بعض الناس المتعبه ف حياتي ومش بتعرف تعمل مسمي

وف الاخر صلي لو انت جرحت حد لأنك مكنتش امين ورايح راجع معاه  ..وصلي لأجل اللي جرحته

او أنه حد عمل معاك كدا وانت اللي مجروح

الصلاة مش مخدرات ..الصلاه بس هتهدي روحك وتحطك ف المكان بتاع قيمتك الحقيقيه لان اغلب جروح العلاقات بتفقدنا قيمتنا .. بتشدد رجلك تقوم لسبق جديد

..الموضوع دا مش بيتعالج بالوعظ دا عباره عن دغدغة مشاعر  وبيتعالج بالمشاعر  والتفاهم والطبطبه والاحترام  .

بقلم : نانسي ناجح


Share