بداية حياة

27 يناير 2019 Uncategorized


البدايات الجديدة بهجة،فرحة…البدايات الجديدة أمل ورجاء…

البدايات مهمة جدااا وأهميتها متقلش عن النهايات لأنها عمرها ما بتتنسى ….وخصوصا لو كانت البداية ديه بداية حياة…

مش عارفة اقول البداية من امتى من أول ما عرفت أنك بتتكون جوايا،ولا من أول مرة سمعت فيها قلبك بيدق ،ولا من أول مرة أعلنت فيها عن وجودك وخبطت بإيدك ورجلك جوايا وكأنك بتقولي أنا هنا معاكي ،أنتي مش ماشية لوحدك انا جواكي،قلبي جنب قلبك ودمي مختلط بدمك…

عشت انا وانت فترات ترقب وقلق،يا ترى هايكون شكلك أيه…شبهي ولا لأ..؟،لون شعرك .. لون عينيك..هاتبقى أمور وكل البنات يجروا وراك، هاتبقى أبيض ولا أسمر…وكل ما كان شهر يمر كنت بأحس أنك بتكبر جوايا وبتطمني انه خلاص نهاية وجودك جوايا قربت وهابدأ معاك بداية تانية، بداية حياتك في عالمنا … بداية أني ألمسك وأحضنك وأحس بنفسك حواليا…

لحد ما جات اللحظة وغبت دقايق عن الوعي وقف فيها الزمن…وفجأة فتحت عنيا لاقيتك قدامي نايم زي الملاك، أخدتك في حضني وبصيت في وشك، قولتلك بقلبي قبل لساني:

“أنت بدايتي الجديدة…أنت حياتي الجاية كلها.. أنت البداية والنقطة الفاصلة اللي مش شبه كل اللي فات”…

ساعتها حسيت اني بأبدأ معاك حياة…حياة جديدة…حياة مافيهاش أي حاجة من كل اللي فات…حياة مليانة قلة نوم وضغط وكركبة…حياة فيها مزيج من الضحك واللعب والعياط والقريفة…حياة جواها أحاسيس اول مرة باعيشها بجد بعد ما كنت باسمع عنها  من اللي حواليا الكتير والكتير…

بداية إحساسي أني مش عايشة لنفسي لكن عايشة بيك وليك…بداية إحساسي اني فجأة مبقتش بافكر أني أبقى احسن واحدة لكن عايزاك انت أحسن مني وأحسن من كل الناس..دا أنا بأكل وباشرب علشانك، باتنفس علشانك…باشتغل وباتعب كمان علشانك…

باعيش معاك كل يوم بداية جديدة، كل نظرة براءة ومحبة صادقة وصافية من عينيك بتقولي دايماً أنه لسة فيه أمل أنا معاكي يا امي متخافيش…

كل نظرة شقاوة وضحكة كسوف بتقولي أنا بحبك …

وكل حضن بأحس فيه أني ماسكة الدنيا كلها بإيديا وأن العالم كله ولا يسوى قصاد حضنك الدافي…كل بوسة بحنية على خدي أو على راسي بتحسسني أني ملكت كنوز العالم كله…

معاك يا ابني عرفت معنى البداية الجديدة،عرفت بهجة وفرحة البداية…في يوم هاتكبر وتعرف أنك انت بدايتي …معاك ابتدت حياتي وكأن كل اللي فات منها كان مجرد أيام وسنين عدت وخلاص…

الأمومة  مزيج مشاعر مختلفة ..الأمومة حب من غير شروط…الأمومة تضحية وامان ودفا…الأمومة تعب بإنبساط…الأمومة شرف وفخر وإمتياز من الله…

الأمومة فعلا بداية حياة…

بقلم : سارة منير 


Share

Leave a Reply

Your email address will not be published. Required fields are marked *