ارجوكم ايها المؤمنون .. كفاكم متاجرة بالالم

بقلم: شادي جاد

يمكن اكون في المقال دا اسلوبي قاسي مش افضل حاجة ، و يمكن اكون مش مرتب الافكار لكن الحقيقة انه جوايا غيظ و ثورة ناحية حاجات بتتقال او بتتعمل وقت الالم …

طبعا الحاجات دي كتير بس انا هاكتفي بكام حاجة في المقال دا …

حصلت كذا حالة وفاة لأشخاص اعرفهم معرفة قريبة و الحقيقة كنت بسمع العجب و هما تعبانين في المستشفي و دا اللي خلاني اكتب الكلام دا

اول حاجة : ابوس اديك بلاش كلام ” الرب وعدني بانك هتشفى و هتكمل الرسالة”  و ” انا اخدت وعد من الرب ” ، دا غير انا شفتلك رؤية و انت هيحصل كذا و كذا ، و انه المرض دا مش للموت و انا متأكد من صوت ربنا و كل القصص اللي بتتقال .. لانه لما بيحصل عكس كده الناس بيبقى عندهم مشكلتين اول حاجة انه الرب كذب عليهم لانه وعد و رجع في وعده و حاشا انه يكون كده ، المشكلة التانية انهم بيفقدوا الثقة في اي كلام من اي شخص بيتكلم عن ربنا …

كان نفسي اشتم بس مش عارف …

بس بطلوا هري و تنطيط و زيطة كدابة و تقولوا الرب قال و اداني وعد و انتوا ماخدتوش حاجة لانه في الحالة دي حاجة من الاتنين يا اما انت نصاب دا لو انت قاصد او انت حابب تبين انه انت ليك علاقة قريبة من ربنا و عندك اللي محدش يعرف يوصله و دي اشتغالة لانه مش كل اللى بيقول يا رب و الرب كلمني يعرف ربنا …

بطلوا توصلوا كلام و وعود للناس من ربنا و هو برئ منها ، بغض النظر عن رأي في موضوع انا شفتلك و حلمتلك و اخدتلك وعد و الدنيا دي اللي بتحصل كتابية او لا لانه دا مش موضوعنا هنا ، بس ابوس ايدك تحط في بوقك بطيخة صيفي و تسكت علشان الناس قفلت من الكلام اللي على الفاضي دا … انا قبلت ناس كتيرة اوى مقفوله من ربنا علشان اداها وعد لمريض و محصلش و مات … اتقى ربنا و صليلهم احسن من لما تقولهم وعد و هما في الوقت دا بيبقوا متعلقين في قشة و فجأة تنكسر … ارجوك كفاك متاجرة بالم الناس سواء عن عمد او جهل سواء لغرض في داخلك او لغرض التشجيع …

الهري التاني و الزيطة الكدابة : روح عند فلان هو يشفيك ،لو اتشفى يبقى فلان دا معدي و عنده موهبة شفاء  ولو متشفاش و مات يبقى العيب مش في فلان لكن العيب في قلة الايمان !!

دي اسمها قلة ادب مش قلة ايمان ..

الموضوع اكبر من اللي بيحصل ، موضوع مشيئة الله في الالم او المرض و الكلام دا كبيير اوي و اختبار اكثر منه شوية زيطة على الفاضي. حتى الشفاء المتوقف على الإيمان القضية دي محتاجة مناقشة و فهم و ادراك لانه اوقات الله بيشفى حتى لو مكنش عندنا إيمان ،  لكن عموما  استخدمنا لمنطق معاكس لبعضه في اسباب الشفاء من عدمه دي مصيبة .. يا جماعة بلاش دار الافتاء اللي احنا عايشين فيها و كل واحد عرف كلمتين عن ربنا يفتي …  صلي و اقعد قدام الرب علشان يفهمك فكره و مبادئه ، علشان يعرفك مشيئته اللي مش مرطبته بحدث او فعل لكن مرتبطة بنتيجة نهائة ..

فيه  الزيطة  كمان بتحصل في اوقات الموت او الألم بشكل عام و دا بيبقى مصيبة هو انه الناس بتدي اسباب للألم و كأنهم ربنا وهو عارف كويس اوي اسباب الالم و سبب اللي بيحصل …

ابوس اديكم ماتدوش وقت الالم اسباب الالم ، المتألم صدقني حتى لو بيسأل عن اسباب الالم هو مش محتاج الاسباب بس هو محتاج ايد تسنده و بالايد التانية تطبطب عليه ، اما اللي بيحصل من تفسير و تحليل للامور دي كارثة و مصيبة لازم الناس تتحاشاها … موضوع الالم اكبر من الكلمتين اللي حضرتك اتعلمتهم و جاي تتنطط علينا بيهم ..

انا مش عارف احنا ليه بنقف وقفة المدافع عن الله و هو مطلبش مننا كده ؟؟ !!

احنا دايما عاوزين نحس اننا بنعرف نجاوب على كل الاسئلة عن ربنا لانه كده نبقى احنا عارفينه لانه لو حد سئلنا سؤال و معرفناش نجاوب في الحالة دي يبقى معرفتنا ضعيفة …

الله يخليكم حسوا بالناس لانكم بتجرحوهم باجابتكم اللي مفيش جواها غير بس انه عندك المعرفة و قادر ترد ، حتى لو اجابتك صح بس من غير ما تحس ملوش اي لزمة ..

كفاكم متاجرة بالالم علشان تثبتوا انكم تعرفوا الاله جيدا ، ابكي مع الناس متجوبش ، اصرخ و صلي مع الناس لكن متبقاش مدافع او صاحب وعود .. عزي بالتعزية اللي عندك لكن ابوس اديك متوعظش  …

اسيبك لضميرك و انا بفكر معاك في سؤال مهم … كام واحد تاجرنا بالمه سواء عن قصد او عن جهل بسبب تصرفنا الغبي وقت الالم و زعل من ربنا بسبب كده ؟؟ !!