fbpx

الحرية 1 – تحليل الشخصية

Written by on 12 April 2018

بقلم : أمير طلعت 

جزء أساسى من الحرية هو حرية التعبير عن الرأى والإتفاق والإختلاف

جزء أساسى من التعبير عن الرأى بيبقى حرية تحليل الشخصية اللى قدامى صاحبه الرأى والتعبير عنها فى كلمات بسيطة مختصرة قد تخص الأب او الأم وقد تقتصر على الشخص فقط

دور على شتيمتك قصدى شخصيتك فى الحاجات دى :

1- بتحب تقعد هادى وكلامك قليل .. منطوى ورخم وعيل تقيل ومش سلس فى التعامل

2- شقى وبتحب تهزر وتتعرف على الناس .. عيل هايف ومش راسى

3- بتتكلم فى الدين .. متخلف ومن العصر الجاهلى و ضد الإنسانيه

4- بتتكلم فى السياسة .. عيل ماتعرفش ربنا وبتتكلم عن حاجات فانية وبتهتم بحاجات أقل أهمية من ربنا

5- ملحد .. مش هاقدر أكتب الشتيمة اللى هتتقال لعدم خدش حياء القارئ

6- مؤيد لأى حاجة .. إنت عبد وماعندكش رأى ولا حرية وهتعيش كلب للحاجة اللى بتأيدها

7- معارض لأى حاجة برضو .. خاين وعميل وضد البلد والناس وضد نفسك

8- محايد .. روح إنتحر أفضل إنك تعيش إنسان هايف مالكش رأى

9- بتقول رأيك عن طريق الشتيمة .. قليل الأدب وماتعلمتش إزاى تعبر عن رأيك

10- بتقول رأيك من غير شتيمة .. بتجمل الكلام ومش صريح ومش بتسمى الحاجات بأسمائها

11- عندك أصحاب مختلفين عنك فى الرأى .. تبقى زيهم بس خايف تقول علشان جبان وماعندكش الشجاعه تعبر عن رأيك

12- مش بتصاحب ناس مختلفين عنك فى الرأى .. عنصرى ومتعصب لرأيك ومش بتقبل الآخر

13- بتتناقش فى الآراء .. عامل فيها فيلسوف وإنت مش فاهم حاجة ومصمم تقنع الناس باللى فى دماغك

14- مش بتتناقش .. يا إما عنصرى يا إما ماعندكش أصلا كلام ولا محتوى تقوله

15- عايز تهاجر .. هتموت على الفلوس قوى وفاكر روحك هتسافر تبقى مليونير

16- مش عايز تهاجر .. عيل فقرى وغاوى تعيش فى القرف

دى طبعا مش كل الآراء ولا كل الشخصيات

بس لو كنت واحد من اللى فاتوا دول تبقى عرفت شتيمتك أو جزء منها .. ولو مش واحد منهم أحب أطمنك إن شتيمتك مش هتختلف كتير عنهم

مرحبا بك فأنت بين شعب يعتبر حرية الرأى هى حرية الإهانة للخصم

#يتبع


Reader's opinions

Leave a Reply

Your email address will not be published. Required fields are marked *



Current track

Title

Artist