fbpx

الحرية 2 – الإستقلال والإستهبال

Written by on 12 April 2018

بقلم : أمير طلعت 

الكلام المرة دى ممكن تلاقوه ملخبط شوية مش مترتب لأنه إتكتب فى وقت قليل واللى فى دماغى كتبته على طول وانا نوعا ما متضايق من الموضوع ده … خلينا ندخل فى الموضوع على طول

طول ما فيه حرية يبقى فيه إستقلال .. لكن الأيام دى بقى فيه إستهبال ….

إزاى ؟؟

أى حد عايز يعمل أى حاجة يعملها تحت شعار أنا حر ودى حاجة تخصنى ومش من حقك تعترض علىّ .. ولو مش عاجبك كلامى او رأيى او تصرفاتى ماتكلمنيش ، ما تتعاملش معايا ، إعملى unfollow , unfriend … دا رأيى الشخصى وانا حر فيه

وبصراحة جزء من الكلام دا صح .. إنت فعلا حر إنك تقول رأيك وليك شخصيتك المستقلة .. بس مش حر إنك تبقى مبتذل وطول الوقت بتهرى فى أى كلام .. لأنك ببساطة مش لوحدك فى الكون ولا إنت مقياس الكمال اللى تقدر تكون لوحدك دايما على حق .. مش معنى إنك مقتنع بالحاجة إنها تكون صح

بس بناء على تعريف الشخصية المستقله اللى ماحدش ليه دعوة بيها .. انا هطالب بشوية حاجات :

– ماحدش يطلب من الشباب يبطل معاكسة لأنه حر يقول رأيه فى البنت ولبسها وجسمها طول ما إيده جنبه

– ماتتضايقش قوى من الأغانى والأفلام الهابطة والألفاظ اللى بتنتشر بين الشباب بسببهم .. هم أحرار يقدموا اللى عايزينه

– ماينفعش أعاقب حد لو عمل أى حاجة ولا حتى بالقانون .. لأنه حر وهو مش مقتنع بالقانون ده أصلا

– ماتضايقش لو حد قلع عريان فى نص الشارع .. الراجل حران يا سيدى وحر فى هدومه

– لما سيادتك تقول رأيك اللى إنت حر فيه أى حد كمان حر جدا إنه يشتمك بالأب والأم لو ماعجبوش رأيك .. هو حر ودى طريقته الشخصية فى التعبير عن رأيه ولو مش عاجبك ماتبقاش تقول رأيك قدامه علشان ماتجيبش الإهانة لنفسك

وفيه غيرها كتير من المطالب اللى هتخلى نتيجة الإستقلال والحرية الشخصيه عبارة عن فوضى وماعندناش معايير بتحكمنا فى الأخلاق ولا فى التعامل بينا وبين بعض .. مجرد همج بيتفلسفوا على بعض و بيناطحوا فى بعض بمبدأ اللى مش عاجبه يخبط دماغه فى الحيط

بصراحة مش عارف أنهى الكلام إزاى …

– قول رأيك علشان تأثر فى الناس مش علشان تتمنظر و تعمل فيها فيلسوف وجرئ وبتعمل حاجات تصدم بيها الناس والمجتمع لان مش الهدف هو الصدام لكن التغيير

– لو نظرتك للحرية الشخصية هى إنك (إنت) تكون بتعمل اللى (إنت) عايزه بأى طريقه (إنت) تحبها .. فإنت إنسان سطحى جدا مش بتفكر غير فى نفسك ومش عامل حساب إنك عايش وسط ناس تانى بيتأثروا بيك وبيأثروا فيك … أوعى تيجى بعد كده تتكلم عنهم لأنك من الاول إفترضت إنك عايش وحدك

بس كده كفاية … دا كل اللى فى دماغى دلوقت


Reader's opinions

Leave a Reply

Your email address will not be published. Required fields are marked *



Current track

Title

Artist