الحرية 3 – على فين يا حرية ؟؟

بقلم :أمير طلعت 

كل واحد كان بينادى بالحرية كان بيبقى عايز حاجة معينه مش مجرد كلمة حرية فى المطلق .. علشان كده هنشوف ملخص بسيط لناس كانوا بينادوا بالحرية .. يمكن نتعلم منهم حاجة

غاندى : كان كل هدفه إن الإستعمار يشيل إيده من على الهند وتقدر الدولة تعلن إستقلالها .. وكل ده بدون أى حروب لكن بشكل سلمى

مارتن لوثر كينج : كان بينادى بالمساواة بين الأفراد وبيحارب العنصرية ضد السود اللى كانت موجودة فى الوقت ده وكان متأثر جدا بإسلوب غاندى فى النضال السلمى فقرر إنه يمشى نفس الطريق .. ووسع النطاق علشان يبقى بيحارب ضد الظلم عموما

قاسم أمين : راجل حارب علشان حقوق المرأة وعلشان يديها وضعها ومكانتها وقيمتها .. كان دايما مهتم إنها تكون بتتصرف صح وبتخرج للمجتمع علشان تفيده

ليه بنحكى عن الناس دول وعن تجاربهم فى النضال علشان الحرية ؟؟؟

كل واحد من دول وناس غيرهم كتير كان بيحارب علشان الحرية فى مجال معين ( إستقلال الدولة ، العنصرية ، ….. )

ماكانش بيحارب علشان الحرية المطلقة اللى مالهاش معالم .. ماكانوش بينادوا بشعارات فى الهوا

الناس دول كانوا عارفين هم عايزين يوصلوا لإيه وعلشان كده عرفوا يوصلوا إزاى

رأيى الشخصى اللى ممكن تتفق معايا فيه أو تعترض ..

الحرية اللى بينادى بيها شريحه كبيرة من الشباب دلوقت هى حرية عايز أعمل اللى عايزه ومش عايز محاسبه ومش عايز حد يضايقنى ومش عايز حد أصلا

أنا حر إذا انا كائن قائم بذاته لا أخضع لأى حاجة ولا لأى مرجعيه

مع إن الحرية مش إنك تبقى عشوائى ومش خاضع لأى فكر ودايما نشاذ وبدون هدف

الحرية الحقيقية هى اللى بيبقى ليها هدف وملامح ، وتاخدك ناحيه حته فيها نضافه فكر ، وتضيف ليك وللناس اللى حواليك .. مش بس بيبقى هدفها (إنت) لكن هدفها (إحنا)

وعلشان (إحنا) تظهر فى الجملة محتاجة قبلها حاجة هنتكلم عنها فى المقالة اللى جاية

 ” منين يا حرية ؟؟ “