fbpx

ياااااه ذكريات رمضان

Written by on 13 May 2019

ومين فينا ماستناش جملة (مدفع الإفطار إضرب) ولا مين ماستناش مسلسل بكار بفارغ الصبر قدام التلفزيون، ولا هتقولي كمان إنك ملعبتش بالفانوس ولا علقت الزينة.

كلنا عملنا كده طبعاً وكمان قعدنا نتفرج مع أهالينا على مقالب زكية ذكرية، ومقولكش على الضحك اللي كنا بنضحكه على ردود أفعال الناس، وبعد كده كنا بنتفرج على المسلسل ونقعد نحكي تفاصيله طول اليوم ونتوقع هيحصل ايه في الحلقة الجديدة.

ولا البرنامج اللي بيكون مستضيف نجم ارتبطنا بيه وحبناه، ويقعد يحكي عن حياته وقصة صعوده وأزاي إكتشفوه والتحديات اللي قابلته وإزاي عافر وثابر لحد ما وصل لحلمه، وياه على المواقف المضحكة اللي حصلت معاه…

يااااااااه احلى وأجمل ذكريات

لكن كل ما افكر إن اللي بيتقدم على الشاشات دلوقتي هيبقى الذكريات لأطفال الجيل الحالي، بنزعج وبطني بتكركب !!!

معقوله اللي بيحصل ده معقوله مفيش مسلسل واحد عائلي ينفع للأسره كلها بكل أعمارها؟ معقوله كل المسلسلات +12 و +16 وكمان بتوصل +18 ؟؟؟؟؟

معقوله رمضان يتحول لموسم الخروج عن كل ما هو أخلاقي من عنف وألفاظ خارجة ومشاهد خليعه وخيانات زوجية وعنف بدني وخناقات في الشارع وحقد وكراهية ….

ولا برامج التوك شو كلها عياط وخناقات وكل ماجبت فضايح الضيف كل ما كانت الحلقة مولعة أكتر وناجحة، ووسع وسع وسع لبرامج المقالب اللي 100% منها شتيمة بألفاظ نابية من نجوم كبار ارتبطنا بيهم في مجالات مختلفة.

احنا مين ؟ إحنا فين ؟ رايحين فين ؟ هل هو ده رمضان ؟


Reader's opinions

Leave a Reply

Your email address will not be published. Required fields are marked *



Current track

Title

Artist