On this day

بقلم : أمير طلعت 

فى الفترة الأخيرة الفيس بوك ضاف إمكانية إنك تقدر كل يوم تشوف إنت عملت إيه فى اليوم ده خلال كل السنين اللى إنت قضيتها على الموقع … والموضوع عجبنى فى الأول بس قلب معايا غم

ليه بقى ؟؟؟

الموضوع بدأ بأيام عدت كنت بافتكر ذكريات جميلة سواء صور أو حاجات انا كتبتها او أيا كانت الحاجة. وأحيانا كنت باتبسط وانا باتأمل التغيير والنقله فى الإسلوب بين كل سنة والسنة اللى بعدها.

الغم كله إبتدى لما فتحت فى يوم لقيت إن كل الذكريات هبله وياريتها تتمسح أحسن .. اليوم اللى بعده لقيته ماختلفش كتير .. اللى بعده واضح إنى كنت واخد قرار إنى أنيلها .. وأحيانا كنت باحس إن مافيش اى إختلاف نفس الهبل هو هو كل سنه بإختلاف المواقف والكلام.

لنا هنا وقفه 🙂

مين فينا مش عايز يتطور ويبقى أفضل ؟؟ … مافيش

مين فينا مش عايز ذكرياته تكون دايما جميلة ؟؟ … مافيش

مين فينا مش عايز يبص على اللى فات ويبتسم ؟؟ … مافيش

مين فينا مش عايز يحس إنه كان بيكبر وإنه إختلف دلوقت عن زمان ؟؟ … مافيش

مين فينا بيحب الإحساس بالفشل والفراغ ؟؟ … مافيش

مين فينا نفسه يلاقى نفسه ولا حاجة و ماوصلش لأى حاجة مفيده فى حياته ؟؟ … مافيش

مين فينا بياخد باله وبيعمل حساب إن اليوم إنهاردة هو خطوة مهمه لبكرة ؟؟ … قليلين

تفتكر إحنا بنجتهد كفاية إننا نخلى الحاضر ماضى مشرف لمستقبل مختلف ؟

………….. !!!